ფსიქოლოგის ქეისებიდან. 
„მე და გიო თექვსმეტი წლის დავქორწინდით. ერთმანეთი ძალიან გვიყვარდა. მატერიალურად მშობლების ხარჯზე ვცხოვრობდით, რადგან არ ვმუშაობდით. პირველი გოგონა შეგვეძინა, ოჯახში მოთხოვნილებები გაიზარდა, რასაც დაპირისპირება მოყვა. გიო ყოველდღე იცვლებოდა. ვგრძნობდი, რომ ოჯახში მოსვლა აღიზიანებდა, ბავშვს გაეთამაშებოდა, შეჭამდა და ქუჩაში გარბოდა. ამაზე ჩემი დედამთილი გიჟდებოდა -სამსახური იშოვე, ცოლ-შვილს მიხედე, მეტი არ შემიძლია... ყოველდღე ეს ფრაზები მესმოდა. გიოს შესაფერისი სამსახური ვერ გამოინახა. ურთიერთობა მაშინ დაგვეძაბა, როცა ერთ დღეს აღმოვაჩინე, რომ ჩემი საქორწინო ოქროს ბეჭედი სადღაც გაქრა. გიომ აღიარა, რომ მან გაყიდა, რადგან ფული სჭირდებოდა და მშობლებს ამდენ ფულს ვერ მოსთხოვდა. ამაზე პროტესტი გამოვთქვი. შეურაცხყოფაზე გადმოვიდა, საშინელი სიტყვებით მლანძღავდა: რას ამეკიდე, შენ რომ არა, სულ სხვა ცხოვრება მექნებოდა, ფეხებზე მკიდია შენი სიყვარული... ასეთი დამოკიდებულება კიდევ განმეორდა, მთელი ოჯახი გიოს დაუდგა გვერდით. მეუბნებოდნენ, ჯერ ახალგაზრდაა, გადაუვლის, უნდა მოითმინოო. მოთმინების სანაცვლოდ უარესი მივიღე. ერთ დღესაც, ნაცემი და გასისხლიანებული, ბავშვთან ერთად მშობლებს მივადექი. ისევ თავიდან დაიწყო ყველაფერი. მითხრეს, უნდა მოითმინო, ოჯახი შენ ცეკვათამაში ხომ არ გგონიაო... ოჯახი მაინც ვერ შევინარჩუნე, ახლა ბავშვთან ერთად დედასთან ვცხოვრობ. გული მწყდება, რომ ეს ნაბიჯი გადავდგი. სკოლაში კარგ მოსწავლედ ვითვლებოდი, შემეძლო ჩემი ცხოვრება სულ სხვა გზით წამეყვანა. მარი, 22 წლის."
გაანალიზეთ და შეაფასეთ მოცემულ სიტუაციაში მიღებული გადაწყვეტილება 
დაასახელეთ პრობლემის გადაჭრის სულ მცირე ერთი ალტერნატიული გზა და დაასაბუთეთ მისი მართებულობა.

Items